FAİQ BAĞIRZADƏ MƏMMƏD OĞLU

Akademik

1949-cu ildə Azərbaycan Sənaye İnstitutunun (hazırda ADNSU) geoloji-kəşfiyyat fakültəsini bitirib mühəndis-geoloq ixtisası almışdır. 1952-1954-cü illərdə Azərbaycan Sənaye İnstitutunun neft və qaz yataqlarının geologiyası kafedrasında assistent işləmişdir. 1953-cü ildə namizədlik dissertasiyası müdafiə etmişdir. 1954-1962-ci illərdə kafedranın böyük müəllimi və dosenti işləyib. 1962-1965-ci illərdə Azərbaycan Neft və Kimya İnstitutunun Geoloji-kəşfiyyat fakültəsinin dekanı işləmişdir. 1964-cü ildə isə doktorluq dissertasiyası müdafiə etmişdir. 1964-1965-ci illərdə Birmada Ranqun Texnoloji İnstitutunda professor,1965-1970-ci illərdə Azərbaycan Neft və Kimya İnstitutunun xarici vətəndaşların təhsili üzrə fakültəsinin dekanı, 1966-1970-ci illərdə neft və qaz yataqlarının geologiyası kafedrasının professoru, 1970-ci ildə isə kafedranın müdiri vəzifələrində işləyib. Həmin ildə o, ADU-ya rektor təyin edilib. Onun iştirakı ilə universitetin tədris-material bazası xeyli genişlənir, yeni kafedralar, tətbiqi riyaziyyat fakültəsi açılır, bir sıra yeni sahələr tədris olunur, institutlararası elmi tədqiqat hesablama mərkəzi təşkil olunur. 1976-cı ildə F.M.Bağırzadə Azərbaycan EA-ya müxbir üzv, 1983-cü ildə isə həqiqi üzv seçilmişdir. 1980-ci ildə ona Azərbaycan SSR-in əməkdar Elm Xadimi fəxri adı verilir. 1985-ci ildə o, bir qrup alimlə birlikdə «Azərbaycan SSR-in neft və qaz yataqları və perspektivli strukturları xəritəsi»nin tərtibinə görə Azərbaycan Dövlət Mükafatına layiq görülmüşdür. Akad. F.M.Bağırzadə 100-dən çox elmi məqalə, 12 monoqrafiya, geologiyanın və geokimyanm müxtəlif problemləri üzrə çox sayda dərslik və tədris vəsaiti dərc edilmişdir.