ƏZİZ ƏSGƏROV HƏMZƏ OĞLU

Professor

1934-cü ildə ADU-nu bitirib, geologiya və paleontologiya kafedrasının assistenti və aspirantı olmuşdur. 1938-ci ildə namizədlik, 1949-cu ildə isə doktorluq dissertasiyası müdafiə etmişdir. Prof. Ə.H.Əsgərov ADU-nun ümumi geologiya və hidrogeologiya kafedrasına 45 il əvəzsiz başçılıq etmişdir. İlk dəfə olaraq Azərbaycanın mineral sularının əmələgəlməsinin hidrogeoloji şəraitini, kimyəvi tərkibini və paylama qanunauyğunluqlarını müəyyən etmişdir. 1979-cu ildə üç mineral su yatağını (Vayxır, Badamlı, Sirab) açmışdır. Onun tərtib etdiyi layihə və onun əsaslandırması ilə Azərbaycanda İstisu, Naftalan, Qalaaltı, Nabran, Şuşa və digər su- müalicə və sanatoriya tipli kurortların tikintisinə başlanılmışdır. Ə.H.Əsgərov Azərbaycanın yeraltı, mineral və termal sularına həsr olunmuş 3 monoqrafiyanın, 1 dərsliyin, 6 elmi-kütləvi kitabçanın və 100-dən çox elmi məqalənin müəllifidir. 39 elmlər namizədi hazırlamışdır.