SƏTTAR SÜLEYMANOV MÜTƏLLİB OĞLU

Professor

1930-1936-cı illərdə S.Orconikidze adma Moskva Geoloji-Kəşfiyyat İnstitutunda oxumuş və mühəndis-geoloq ixtisası almışdır. 1939-1950-ci illərdə Azərbaycan Geologiya İdarəsində geoloq, partiya rəisi, baş mühəndis vəzifələrində işləmiş, 1947-ci ildən isə bu idarənin müdiri olmuşdur. 1947-ci ildə namizədlik dissertasiyası müdafiə edib. 1950-ci ildə S.M.Süleymanov pedaqoji işə keçib. O, ADU-nun «Kristalloqrafiya, mineralogiya və petroqrafiya» kafedrasında böyük müəllimdən kafedra müdirinə qədər yol keçir. Sonralar bu kafedra ixtisas kafedrasına çevrilərək, 1958-ci ildən «Faydalı qazıntılar» kafedrası adını daşıyır. Həmin kafedraya 1986-cı ilə kimi prof. S.M.Süleymanov rəhbərlik edir. 1952-1963-cü illərdə S.M.Süleymanov ADU-nun Geologiya-coğrafiya fakültəsinin dekanı olmuşdur. 1958-ci ildə doktorluq dissertasiyası müdafiə etmiş, 1960-cı ildə ona professor rütbəsi verilmişdir. 1978-ci ildə «Kiçik Qafqazın civə yataqlarının geologiyası» monoqrafiyasının müəlliflərindən biri kimi o, Azərbaycan Dövlət Mükafatı laureatı adına layiq görülmüşdür. S.M.Süleymanov 150-dən çox elmi əsər, 10 monoqrafiya və dərsliklərin müəllifidir. 40-dan çox elmlər namizədi və doktoru hazırlamışdır.