BDU-nun Faydalı qazıntılar muzeyinin BP və tərəfdaş şirkətlərin dəstəyi ilə əsaslı təmirdən sonra açılış mərasimi
Bakı Dövlət Universitetinin (BDU) Faydalı qazıntılar muzeyinin BP və şirkətin Azəri-Çıraq-Günəşli, Bakı-Tbilisi-Ceyhan, Şahdəniz və Cənubi Qafqaz Boru Kəməri layihələrindəki tərəfdaşlarının (“SOCAR”, “TPAO”, “LUKOİL”, “SGC”, “NİCO”, “MOL”, “İNPEX”, “ExxonMobil”, “İTOCHU”, “ONGC Videsh”, “Eni”, “MVM” və “TotalEnergies”) dəstəyi ilə əsaslı təmirdən sonra açılışı olub.
BDU-da tədris infrastrukturunun modernləşdirilməsi və genişləndirilməsinə yönəlmiş bu layihə Azərbaycanın zəngin geoloji irsi, təbii ehtiyatları və bu sahədəki elmi nailiyyətlərinə dair məlumatları əhatəli şəkildə təqdim etmək məqsədilə yaradılıb.
Muzeyin açılışında çıxış edən rektor Elçin Babayev bildirib ki, Faydalı qazıntılar muzeyi elm-tədris-sənaye əməkdaşlığının ən gözəl nümunəsi hesab edilə bilər. Məkan kitabxana-muzey-tədris laboratoriyası kimi fəaliyyət göstərməklə BDU-da tədris prosesinin keyfiyyətinə öz müsbət təsirini göstərəcək. Muzey yalnız BDU tələbələri deyil, digər universitetlərin tələbələri, orta məktəb şagirdlərinin üzünə də açıq olacaq. BDU ölkənin ən qədim universiteti kimi öz tarixi və dünya şöhrətli məzunları ilə fəxr edir. Tarixi ənənələri davam etdirən Universitetdə son illər rəqəmsallaşma istiqamətində ciddi addımlar atılıb. Rektor belə interaktiv təlim və tədris mərkəzi yaratdığına görə BP şirkəti və tərəfdaşlarına təşəkkür edib. O bildirib ki, BP şirkəti son illər BDU-da bir çox sosial layihələr həyata keçirib, bunlar Universitetin həyatına rəngarənglik qatıb. Rektor xatırladıb ki, muzeydə 1997-ci ildən akademik Musa Əliyev adına kabinet fəaliyyət göstərib: “Bizim üçün fəxrdir ki, görkəmli elm və dövlət xadimi, akademik Musa Əliyev öz kitabxanasını məhz BDU-ya bağışlayıb. Muzeyin əsaslı təmiri zamanı həmin kitabxana da rəqəmsallaşdırılaraq müəllim və tələbələrimizin ixtiyarına verilib. Bu kitabxananın Moskvadan Bakıya gətirilməsində ADA Universitetinin rektoru Hafiz Paşayevin xüsusi rolu olub. Mən bu işə göstərdiyi dəstəyə görə ADA Universitetinin rektoru, professor Hafiz Paşayevə təşəkkür edirəm”.
ADA Universitetinin rektoru, professor Hafiz Paşayev mərasimdə çıxış edərək akademik Musa Əliyevin elmi irsi, keçmiş SSRİ məkanında və o cümlədən Azərbaycanda, Əlcəzairdə həyata keçirdiyi neft kəşfiyyatı işləri barədə məlumat verib. Bildirilib ki, BDU Azərbaycanın elm, təhsil və maarif mərkəzlərindən birinə çevrilib və burada minlərlə mütəxəssis yetişdirilib.
Professor Hafiz Paşayev akademik Musa Əliyev və professor Mir Cəlal Paşayev arasında olan dostluq və elmi dialoqlardan da danışıb.
Qeyd edib ki, biri humanitar, digəri isə təbiət elmləri üzrə fəaliyyət göstərsə də, onların müzakirələri dərin məzmun kəsb edirdi. Eyni zamanda vurğulanıb ki, Xəzər dənizində Neft Daşlarının kəşfində də Musa Əliyevin mühüm xidmətləri olub. Rektor Elçin Babayev professor Mir Cəlal Paşayevin akademik Musa Əliyevə yazdığı əlyazma məktubu Hafiz Paşayevə təqdim edib.
Bp-nin Azərbaycan, Gürcüstan və Türkiyə üzrə regional prezidenti Qəri Counz qeyd edib ki, bu layihə şirkətin ölkədə təhsilə və digər mühüm sosial inkişaf sahələrinə davamlı dəstəyinin gözəl nümunəsidir: “Tərəfdaşlarımızla birlikdə çox məmnunuq ki, artıq bir əsrdən çox tarixi olan və aparıcı, nüfuzlu təhsil müəssisəsi kimi geniş miqyasda tanınan Bakı Dövlət Universiteti bu cür unikal bir mərkəzə sahib olacaq”. BP-nin regional prezidenti 2019-cu ildən başlayaq BDU ilə əməkdaşlıq müqaviləsi çərçivəsində bir çox uğurlu layihələr həyata keçirildiyini bildirib. O, bu mərkəzin geoloji və geofiziki biliklərin zəngin məlumat bazasını innovativ şəkildə təqdim etməyə imkan yaradacağını, BDU-da interaktiv təhsilə fayda verəcəyini bildirib:
“Ümid edirik ki, tələbələr və digər ziyarətçilər ölkənin təbii ehtiyatlarının əsrarəngiz müxtəlifliyini və onun diqqətəlayiq geoloji irsini dərindən anlayacaq və dəyərləndirəcəklər”. Rektor Elçin Babayev universitetin xatirə hədiyyəsini Qəri Counza təqdim edib.
Milli Məclisin sədr müavini, BDU-nun professoru, akademik Rafael Hüseynov, BDU-nun Ümumi dilçilik kafedrasının müdiri, akademik Nizami Cəfərov, Elm və Təhsil Nazirliyinin Geologiya və Geofizika İnstitutunun baş direktoru, akademik Akif Əlizadə, Geologiya fakültəsinin Faydalı qazıntılar kafedrasının müdiri, akademik Vasif Babazadə çıxışlarında akademik Musa Əliyevin Azərbaycan xalqı və elmi qarşısında xidmətlərindən danışıb, Faydalı qazıntılar muzeyinin elm, təhsil, tədqiqat və texnologiya mərkəzi kimi faydalı olacağına əminliklərini bildiriblər.
Tədbir iştirakçıları Xatirə Kitabına ürək sözlərini yazıblar.
