Bakı Dövlət Universiteti Geologiya fakültəsi

Bakı Dövlət Universitetinin Geologiya fakültəsinin Tələbə Elmi Cəmiyyətinin təşkilatçılığı ilə “Geologiyanın karyera yolu” mövzusunda tədbir keçirilmişdir. Tədbirdə sosial məsələlər və tələbələrlə iş üzrə dekan müavini Ələkbər Mirzəyev, TEC-in fakültə üzrə rəhbəri, Ümumi və tarixi geologiya kafedrasının müdiri professor Nazim İmamverdiyev, Seysmologiya və Yer təkinin fizikası kafedrasının saathesabı müəllimi Elfaq Məmmədov və fakültənin bir qrup tələbələri iştirak etmişdir.

Tədbiri giriş sözü ilə açan Geologiya fakültəsinin sosial məsələlər və tələbələrlə iş üzrə dekan müavini Ələkbər Mirzəyev bütün tədbir iştirakçılarını salamlayaraq, keçirilən tədbirin əhəmiyyətindən danışdı. Geologiya fakültəsində təhsil alan tələbələrin gələcəkdə öz karyerlarını qurmaları üçün bir çox karyerayönümlü məsələlərdə inkişafının vacib olduğunu bildirdi. Bu tipli tədbirlərin gələcəkdə də keçirilməsinin tələbələrin fərdi inkişafına böyük töhvə verəcəyini vurğuladı.

Tədbirdə Geologiya fakültəsinin I kurs magistrantı Murad Əzimzadə məruzə ilə çıxış etmişdir. Məruzədə əvvəlcə «Geologiyanın hansı istiqamətini seçməliyəm?, İxtisasım ilə bağlı kursları haradan tapa bilərəm? Və necə müraciət edə bilərəm?» kimi suallarla bağlı məsələlələrə aydınlıq gətirilmişdir. Əsasən geologiya sahəsini seçmiş gənclərin gələcəkdə davamlı məşğulluğunun təmin edilməsi istiqamətində görülməsi vacib olan işlərə diqqət çəkən məruzəçi xüsusilə xarici dil bacarıqlarının mükəmmələşdirilməsini vurğulamışdır. Bununla yanaşı peşəyönümlü seminarlarda iştirakın vacibliyi, xarici şirkətlərdə təcrübə keçməyin önəmi barədə məlumatlar verilmişdir. Öz təcrübəsini bölüşən məruzəçi bu sahədə hələ də tam maariflənməyə ehtiyacın olduğunu söyləmiş və tələbələrin öz üzərində daha artıq çalışmalarının vacib olduğunu nəzərə çatdırılmışdır.

Daha sonra TEC-in fakültə üzrə rəhbəri, Ümumi və tarixi geologiya kafedrasının müdiri professor Nazim İmamverdiyev çıxış edərək bu tipli görüşlərin keçirilməsinin əhəmiyyətli olduğunu bildirdi. Seçdikləri ixtisas üzrə mükəmməl biliklərə yiyələnməklərinin olduqca vacib olduğunu söyləyən Nazim müəllim, gələcəkdə yüksək ixtisaslı kadr kimi formalaşmaları üçün daim öz biliklərini artırmalarını məsləhət gördü. Fakültədə son zamanlar bu sahədə görülən mühüm işlərdən danışan Nazim müəllim bütün tələbələrə gələcək fəliyyətlərində uğurlar arzulamışdır.

Sonda tələləri maraqlandıran suallar cavablandırıldı və müəyyən məsələlər ətrafında fikir mübadiləsi aparıldı.